Quen somos

Rexenerando é unha cooperativa que traballa no eido do social, fundada no ano 2014 no Golfo Ártabro e formada por un equipo multidisciplinar de mulleres.

Traballamos con comunidades e grupos facilitando procesos de transformación social co obxectivo de rexenerar as vidas e os vínculos das persoas:
Co mundo, divulgando o coñecemento da historia e do territorio propiciando relacións máis conscientes, comprometidas e sostibles con el.
Con outras persoas, facilitando espazos de diálogo colectivo, acollendo a diversidade e construíndo modelos de relación desde o bo trato, a colaboración e a xustiza.
Consigo mesmas, promovendo a saúde emocional, o auto-coñecemento e a consciencia sobre a súa capacidade de transformación persoal e social.
Somos unha cooperativa sen ánimo de lucro porque acreditamos nos valores da economía social e solidaria como camiño para rexenerar o tecido produtivo e as relacións laborais, económicas e comunitarias. Formamos parte de Espazocoop.
Os valores que nos guían
A democracia profunda e o compromiso coa diversidade
Os feminismos e a centralidade dos coidados
A defensa da lingua e da cultura propias
O compromiso coas voces e as memorias marxinadas ou subalternizadas
A sustentabilidade persoa-contorna
A apertura cara a autorreflexión e a transformación continua
A honestidade, o compromiso e a transparencia

O equipo

Rexenerando está formada por un equipo de socias e colaboradoras cun obxectivo común: levar adiante proxectos de calidade apoiados en relacións de calidade.

Andrea
Rico

Estudei Educación Social e Pedagoxía, convencida das posibilidades da educación para transformar o mundo. Teño experiencia en deseño e execución de proxectos de intervención socioeducativa, en ámbitos diversos como a igualdade, a educación ambiental ou a formación de persoas adultas. Apaixóname traballar con grupos, acompañármonos na construción colectiva de condicións de vida máis xustas e sostibles. Para poder abordar toda esa complexidade, levo anos formándome de xeito continuo en ferramentas e habilidades para a xestión e facilitación de grupos. Desde 2018 formo parte do Instituto de Facilitación e Cambio (IIFAC-E).

Son socia de Rexenerando, onde coordino a área de Facilitación de grupos e participación social.

Olga
Romasanta

Pandeireteira e historiadora da arte, as miñas paixóns son a memoria colectiva e o apego ao lugar. No eido cultural, formeime en Servizos Culturais e Educación e Museos. Creo na potencia do común e a creación colaborativa, así que nos últimos tempos estoume especializando na Xestión e Facilitación de Grupos e en ferramentas de facilitación gráfica. Teño experiencia desenvolvendo proxectos educativos con infancia e adolescencia, e apoiando procesos participativos relacionados co territorio e o urbanismo. Son socia de Rexenerando, e coordino a Área de Cultura, memoria e territorio.

Martín
V. Añel

O neto da Cándida. Nun proceso de (de)construción que non remata grazas as aprendizaxes dos activismos LGBTIQ e a miña formación como sociólogo na Universidade da Coruña, cidade da que son veciño dende o cambio de milenio. Teño máis de 10 anos de experiencia en investigación social e coordinación de proxectos nos ámbitos da igualdade de xénero, a inclusión da diversidade e a participación cidadá, tanto dende a consultoría privada como dende o asesoramento técnico ás administracións públicas. Nunha aposta por poñer a vulnerabilidade no centro e recoñecer a nosa interdependencia continúo formándome en facilitación de grupos e mediación. As metodoloxías de investigación e a innovación social son outros dos meus intereses. Son socio de Rexenerando, onde coordino a área de Xéneros e identidade.

Marcos
Abalde

Son socio colaborador de Rexenerando. Formeime en Filoloxía Románica e Galega e nun posgrao en Servizos Culturais. Son poeta e dramaturgo e teño tamén experiencia en docencia, xestión e deseño de programas culturais.
Na actualidade dedícome á docencia, mais continúo a colaborar con Rexenerando na asesoría de proxectos que teñen que ver coa activación de falantes para o galego e a recuperación de memorias subalternizadas, dous dos ámbitos cos que me sinto máis comprometido.