Rexenerando está formada por un equipo de socias e colaboradoras cun obxectivo común: levar adiante proxectos de calidade apoiados en relacións de calidade.

Son politólaga, formada en Facilitación de grupos, en Xestión de Proxectos de Medio Ambiente e Responsabilidade Social Corporativa e cun mestrado de Axentes de Igualdade de Oportunidades para as Mulleres no Ámbito Rural. Ademais, na actualidade estoume a formar nun mestrado de Economía Social e Cooperativismo da Universidade de Mondragon.

Deseñei e coordinei diversos proxectos nos ámbitos do xénero e a equidade, e tamén da educación e da cultura. Apaixóname traballar con persoas e grupos, en contextos nos que facilitar o seu empoderamento e nos que afondar nunha visión feminista da realidade.

Son socia de Rexenerando e coordino a área de Xéneros e identidade.

Estudei Educación Social e Pedagoxía, convencida das posibilidades da educación para transformar o mundo. Teño experiencia en deseño e execución de proxectos de intervención socioeducativa, nos ámbitos da igualdade, a educacion ambiental e a formación de persoas adultas. Apaixóname traballar con grupos, acompañarnos na construcción colectiva de condicións de vida máis xustas e sostibles. Para poder abordar toda esa complexidade, levo anos formándome de xeito continuo en ferramentas e habilidades para a xestión e facilitación de grupos. Desde 2018 formo parte do Instituto de Facilitación e Cambio (IIFAC-E).

Son socia de Rexenerando, onde coordino a área de Facilitación de grupos e participación social.

Pandereteira e historiadora da arte, as miñas paixóns son a memoria colectiva e o apego ao lugar. No eido cultural, formeime en Servizos Culturais e Educación e Museos. Creo na potencia do común e a creación colaborativa, así que nos últimos tempos estoume especializando na Xestión e Facilitación de Grupos e en ferramentas de facilitación gráfica. Teño experiencia desenvolvendo proxectos educativos con infancia e adolescencia, e apoiando procesos participativos relacionados co territorio e o urbanismo. Son socia de Rexenerando, e coordino a Área de Cultura, memoria e territorio.

Son deseñadora gráfica e levo máis dunha década traballando no desenvolvemento creativo. Teño unha ampla experiencia en deseño editorial, gráfica publicitaria e identidade corporativa. Moitos dos meus traballos están relacionados co eido cultural. Coordino a área de Comunicación e gráfica.

Case todo o que fago ten que ver coas palabras e a expresión escrita. Son xornalista de formación, especializada en cooperación internacional e en ética. A miña experiencia profesional está vinculada á comunicación en organizacións non lucrativas de diferentes tipos, aínda que tamén coordino e desenvolvo proxectos. Interésanme os dereitos humanos, os feminismos, a literatura e os xeitos diversos nos que interactúan territorios e corpos. En Rexenerando estou a cargo da comunicación e tamén apoio o desenvolvemento dos proxectos das outras áreas.

Son socio colaborador de Rexenerando. Formeime en Filoloxía Románica e Galega, cun posgrao en Servizos Culturais. Teño longa experiencia en docencia, xestión cultural e deseño de programas culturais.